Muskiet het gister eerstehands kennis met die karakters van Miemsie en die vervlakste leeu gaan maak. Met die intrapslag was die spanning onder die kleinspan merkbaar. Hulle het haastig vir Miemsie teen die kietsiekat se mannewales gewaarsku en was so werklik in hul noppies toe dit blyk dat sy na hulle uitroepe luister.
Die jongelinge het behoorlik aan die karakters se lippe gehang en die hele petalje wat voor hulle ontvou het, grootoog bekyk. Dit was egter nie net hulle wat met die vertoning beïndruk was nie - hulle mammas en pappas was ook. Hier en daar kon jy 'n kuggie of 'n beaming hoor, en na die tyd het ook die applous van hulle kant af boekdele gespreek.
Die twee poppespelers en meesterbrein agter die karakters, Michelle Botha en Erentia Bedeker, vertel aan Muskiet dat hulle eerste Innibos sover nog nét 'n positiewe ervaring is. "Dis heerlik! Ek was nou al by ander feeste ook, maar hierdie fees is nommer 1."
Erentia sê dat sy veral die kleinspan se interaksie met die poppekarakters geniet het, en die die spreekwoordelike kersie op die koek is. Michelle deel haar sentiment en vertel dat sy balans as die wenresep in hulle produksie beskou. "Mamma en pappa kom en bring die kleingoed hierheen, so ons moet darem iets vir hulle ook kan gee!"
Artikel deur Jana Schlechter
